Премиерот Христијан Мицкоски се обрати на „German-Macedonian Business Summit 2026“, нагласувајќи дека соработката со германските компании е клучна за економската трансформација на земјата.
Тој порача дека дигиталната трансформација и економијата базирана на знаење се приоритет за државата, истакнувајќи дека идниот раст повеќе не може да се темели само на евтина работна сила, туку на иновации, технологија и човечки капитал.
Мицкоски нагласи дека Германија е важен економски партнер и симбол на индустриски и технолошки развој, додавајќи дека германските компании во земјата не се само инвеститори, туку партнери во модернизацијата на економијата.
Тој истакна дека Владата работи на стабилна и про-бизнис средина преку дигитализација, намалување на административни бариери и подобрување на инфраструктурата, со цел привлекување и олеснување на инвестиции.
Посебен акцент беше ставен на развојот на образованието и вештините, при што премиерот порача дека младите треба да имаат можност да останат во земјата и да градат кариера во модерна економија.
Мицкоски додаде дека Северна Македонија има потенцијал да стане регионален центар за технологии, производство и дигитални услуги, но дека за тоа е потребна силна соработка меѓу државата, индустријата и странските партнери.
На крајот од обраќањето, тој порача дека иднината на земјата се гради преку партнерства, знаење и технологија, со цел создавање модерна европска економија./Извор:Makfax
