Министерот за внатрешни работи во вечерашната емисија Топ Тема, образложи колку толеранција ќе биде воведена со новите камери од проектот Сејф сити.
– Ако одредено возило е управувано со 57 км/ч, а е дозволено 50, камерата за мерење на брзината ќе констатира прекршок. Доколку возилото е управувано со 56 км/ч, електронскиот систем нема да го констатира како прекршок. Но она што е важно е дека доколку, еве јас управувам моторно возило со 53 км/ч на место каде што е дозволено 50, сообраќаен прекршок нема да биде евидентиран затоа што нема да ме фати радарот или камерата, но не дај боже, доколку сторам одредена материјална штета – повредам пешак или велосипедист, јас ќе одговорам соодветно согласно одредбите од Кривичниот законик, рече Тошковски.
Инаку според постоечката регулатива, значи дека толеранција е до 6 км/ч каде што е дозволена брзина до 100 км/ч, понатаму 8 км/ч каде што е дозволена брзина над 100 км/ч и толеранција од 12 км/ч каде што е дозволена брзина на движење на моторно возило над 200 км/ч, рече Тошковски.
Министерот за внатрешни работи најави и активирање на онлајн апликација преку која граѓаните ќе може да ги ажурираат податоците, да проверат каде има камери и тн.
