Сојузот на борците од НОАВМ 1941-1945 и граѓаните продолжувачи жестоко реагираат на одлуката на Владата да даде согласност за формирање основно училиште во општина Студеничани кое ќе го носи името на профашистичкиот колаборационист и балист Азем Морани.
Во отвореното писмо до Владата, Главниот одбор на Сојузот предупредува дека оваа одлука претставува опасен преседан кој поттикнува историски ревизионизам и директно ги подрива асномските темели на Македонија како антифашистичка држава.
„Недозволиво е, во време на постојани обиди за релативизација на историските вистини однадвор, истото да си го правиме и одвнатре. Азем Морани е осуден во 1947 година за профашистички, балистички и колаборационистички активности за време и по Втората светска војна, насочени против македонската држава и против слободите и правата на сите граѓани,“ наведуваат од Сојузот.
Тие потсетуваат дека училиштата се центри на воспитно-образовниот процес и мора да ги пренесуваат на младите генерации вистинските вредности – антифашизам, космополитизам и човечност, а не имиња кои го величаат предавството и соработката со фашистички режими.
Сојузот бара Владата итно да ја преиспита и повлече оваа одлука, со јасна порака дека Македонија останува на страната на антифашистичките идеали и историската вистина.
