На четвртата седница на Економско-социјалниот совет, министерот за економија и труд, Бесар Дурмиши ја истакна важноста од повторното активирање на трипартитниот дијалог меѓу Владата, синдикатите и работодавачите, кој претставува суштински механизам за социјална кохезија и економски напредок. Тој ги поздрави новите претставници на Конфедерацијата на слободни синдикати, со што, како што рече, се враќа легитимитетот на Советот.
Министерот информираше дека е успешно завршена постапката за утврдување на репрезентативноста на синдикатите – прашање што подолг период го блокираше нормалното функционирање на ЕСС. Воедно, се предложени измени на Законот за работни односи, со кои прагот за репрезентативност се намалува од 10 на 5 проценти, со цел да се поттикне поинклузивен и плуралистички социјален дијалог.
Во фокусот на седницата беше и Ревидираниот Оперативен план за вработување за 2025 година. Со направените измени:
-бројот на лица опфатени со мерките за самовработување се зголемува од 1.730 на 2.545 лица;
-буџетот за овие мерки се зголемува од 16,08 на 23,58 милиони евра;
-вкупниот буџет на планот достигнува 42,6 милиони евра и ќе опфати 16.872 невработени лица.
Средствата се обезбедени преку пренамена на неискористени буџетски ставки и со ребаланс на Буџетот.
Министерот Дурмиши го претстави и процесот за изработка на нова, официјална методологија за пресметка на потрошувачката кошничка, заснована на проверливи и релевантни податоци од Анкетата за потрошувачка на домаќинства, спроведена од Државниот завод за статистика. Новата кошничка ќе служи како основа за градење политики поврзани со минималната плата и социјалните трансфери и ќе биде усогласена со европските стандарди.
Во однос на барањата за утврдување на минимална плата во фиксен износ, министерот потенцираше дека тоа би барало измена на законот, но и дека Владата секогаш го поддржувала дијалогот меѓу работниците и работодавачите.
„Ние никогаш не сме биле против зголемување на платите – напротив, работиме на тоа да има подобар стандард за граѓаните преку поддршка на малите и средни претпријатија, преку инвестиции и мерките од Оперативниот план. Во изминатата година веќе ги зголемивме платите во повеќе сектори – здравство, образование, полиција. Но мора да се има предвид дека минималната плата е уредена со Закон, со јасни и договорени критериуми, донесени со согласност од сите социјални партнери меѓу кои се и работодавачите. Не можеме да водиме економија со еднострани мерки. Минималната плата мора да го следи растот на продуктивноста – во спротивно, ризикуваме инфлаторни ефекти кои пак бараат нови интервенции. , додаде тој.
Во однос на инфлацијата, министерот информираше дека заклучно со јуни, таа изнесува 0,8% (споредено со 1,5% во мај), што е позитивен сигнал за стабилизација на цените. Најголем пораст бележат транспортот, дел од земјоделските производи и берзански стоки, но со внимателна координација со Народната банка и Министерството за финансии се очекува задржување на ценовната стабилност.
На крајот, министерот порача дека Владата останува посветена на економски раст, заштита на работниците и балансирани социјални политики, нагласувајќи дека само преку конструктивен дијалог со сите социјални партнери може да се донесат квалитетни и одржливи политики.
НАЈЧИТАНО НА ИНТЕРНЕТ...
