Општина Илинден постојано работи на уредување и урбанизација на јавниот простор низ сите населени места, создавајќи современи и пријатни зони каде граѓаните можат квалитетно да го поминуваат своето слободно време. Во таа насока, во тек е изградбата на нов урбан парк со повеќе содржини во Марино.
Паркот ќе биде сместен помеѓу улиците „531“, „532“ и „534“, на површина од приближно 5.600 м². Проектот предвидува комплетно партерно уредување, инсталација на улично осветлување, поставување на чешми, клупи, корпи за отпадоци, паркинг простор, пешачки патеки и сервисна улица. Просторот ќе содржи зелени површини, отворен плоштад за јавни настани, фонтана во централниот дел, жардињери со декоративни растенија и детско игралиште опремено со реквизити за најмладите.
Градоначалникот на општина Илинден, Александар Георгиевски, изврши увид во текот на градежните работи и нагласи дека уредувањето на јавниот простор и неговата урбанизација се клучни за обезбедување на квалитетна средина за одмор и рекреација на жителите.
Со овој проект, Општина Илинден продолжува со динамичниот процес на модернизација и уредување на јавните простори низ целата територија на општината.
НАЈЧИТАНО НА ИНТЕРНЕТ...
