„Капацитетите за згрижување на деца до 10-годишна возраст, односно до трето одделение, во градинките на Општина Центар се пополнети,“ информираше градоначалникот Горан Герасимовски за попладневната градска програма на МРТВ.
Со оваа мерка, Општина Центар им излегува во пресрет на родителите со работни обврски кои немаат кој да им ги чува децата. Во моментов во центарските градинки се примени стотина деца од оваа возрасна категорија.
Децата се згрижени во 7 од вкупно 12 клонови на градинките на територијата на општината.
„За нив се грижат дел од негувателките, но и наставничките од училиштата. Тие секојдневно работат со децата, цртаат, пишуваат, пеат, се едуцираат и спортуваат. Времето кое го поминуваат овде, секогаш е исполнето со квалитетна содржина,“, посочи Герасимовски во „Програмата на градови“ на МРТВ.
Дополнително, во сите градинки редовно се згрижуваат и деца од помала возраст. Општина Центар е единствена општина во градот Скопје каде нема листа на чекање за упис на нови деца и Герасимовски потврди дека има слободни места во сите клонови на трите матични градинки.
Со отворањето на новата градинка „Пролет“ општината дополнително ги зголеми капацитетите за прием. Со оваа градинка во секоја населба има градинка во близина за згрижување на деца од предучилишна возраст, истакна градоначалникот на Центар.
ПОПУЛАРНО НА ИНТЕРНЕТ...
