Министерот за внатрешни работи Панче Тошковски на денешната прес конференција потенцираше дека Министерството за внатрешни работи, во соработка со надлежното Јавно обвинителство, ја заврши првата фаза во постапувањето во врска со кривично-правниот настан со пожарот во кочанската дискотека „Пулс“, во кој животот го загубија 59 лица, а има над 160 повредени.
„Поднесени се две кривични пријави против вкупно 34 физички и три правни лица, за кривично дело „тешки дела против општата сигурност“ по член 292 во врска со „предизвикување општа опасност“ по член 288 од Кривичниот законик. Едно лице е пријавено и за „примање поткуп“ по член 357 од КЗ“, соопшти министерот Тошковски.
Министерот Тошковски истакна дека се работи со обемен материјал 24 часа на ден, под огромен притисок и со сите очи на јавноста вперени во истрагата.
„Но, не смееме да брзаме. Затоа што половична правда е неправда. Неправда е и ако осомничиме невини поради гнев, но исто така е неправда и ако не понесат одговорност оние за кои постојат основани докази. Нашата задача е јасна – целосна и правична одговорност, без исклучоци и без компромиси“, потенцираше министерот Тошковски.
