Од СДСМ посочуваат дека коруптивната шема на ВМРО-ДПМНЕ продолжува со полна пареа, а министерот за надворешни работи Тимчо Муцунски се најде во центарот на нов скандал поврзан со милионски тендери и обновување на проектот Скопје 2014, кој светските медиуми го оценија како „најголемиот коруптивен проект во Европа“.
– Според најновите информации, Министерството за надворешни работи доделило тендер вреден 550.000 евра за изградба на челична настрешница, што претставува ново испумпување на народните пари кон фаворизирани фирми. Овој проект е само дел од пошироката тендерска шема на ВМРО-ДПМНЕ, која со години ја изигрува транспарентноста и правдата во државата, велат од СДСМ.
– Договорот за настрешницата е потпишан со „Пирамид билдинг солушнс“, компанија која има долга историја на бизнис односи со Муцунски. Оваа фирма, додека тој беше градоначалник на Аеродром, добила 11 тендери во вредност од 2 милиони евра, а истата компанија добила и договор вреден 335.000 евра за хигиенски и комунални услуги во општината.
Но, коруптивната шема не запира овде. СДСМ открива дека „Пирамид билдинг солушнс“ добила и тендери од унгарскиот кредит, пари што треба да ги враќаат македонските граѓани. Само во последните три месеци, оваа компанија добила тендери во вредност од 1,8 милиони евра, вклучително и реконструкцијата на скверот зад ТЦ Капитол, вредна 700.000 евра, каде на почетокот на работите присуствувал и премиерот Христијан Мицкоски.
Ова е нова потврда дека ВМРО-ДПМНЕ повторно ја враќа старата матрица на корупција, непотизам и злоупотреба на државните ресурси. Народот нема да дозволи повторно да биде ограбуван преку измислени проекти и милионски тендери за блиски фирми на партијата, порачаа од СДСМ.
