Победата на Доналд Трамп на претседателските избори во Соединетите Американски Држави го зајакна доларот во однос на заедничката европска валута, а некои аналитичари дури предвидуваат дека еден долар набргу ќе вреди колку едно евро.
Според податоците на берзата, еврото во 12.35 часот се продаваше за 1,07186 долар и падна 1,98 отсто. Трговците со валути се свртуваат кон еврото бидејќи победата на Трамп ги зголемува шансите за агресивно намалување на каматните стапки во еврозоната, промени што водат до паритет меѓу еврото и доларот.
Холандските банки ABN Amro и ING веруваат дека еден долар ќе се продава за цена од едно евро во наредните месеци, а Дојче банк прогнозира дека еврото ќе падне на 1,05 долар до крајот на годината. Ветувањето на Доналд Трамп за воведување дополнителни царини би можело дополнително да ја ослабни европската економија, што би барало Европската централна банка уште повеќе да ја омекне својата монетарна политика, пренесува „Блумберг“.
„Трамп се врати и сите се плашеа од овој момент. Сосема е јасно дека овој исход, во релативна смисла, не е одличен за европските средства“, изјави глобалниот инвестициски директор на швајцарската банкарска групација „Ломбар Одије“, Михаел Штробек, пренесува „Танјуг“./Извор:Makfax
