Министерот за одбрана на Израел Јоав Галант вечерва ги повика борците на Хамас да се предадат и да ги ослободат заложниците по убиството на водачот на таа екстремистичка организација Јахја Синвар.
„Елиминацијата на Синвар се придружува на долгата листа на елиминации од Насрала до воениот началник на Хамас Мухамед Деиф и многу други терористи. Ќе ги гониме и елиминираме нашите непријатели“, најави Галант, додавајќи дека Синвар бил убиец и терорист и дека го планирал и извршил масакрот на 7 октомври минатата година во кој беа убиени многу невини Израелци.
Министерот за одбрана на Израел рече дека Синвар умрел во бегство, не како командант, туку како некој што се грижел само за себе.
Галант смета дека тоа е јасна порака за сите непријатели на Израел, дека израелската армија ќе ги фати сите оние кои ќе се обидат да им наштетат на израелските граѓани и безбедносните сили.
„Елиминацијата на Јахје Синвар испраќа јасна порака до сите семејства на загинатите и семејствата на заложниците, ќе направиме се за да дојдеме до оние кои ги повредија вашите најблиски и да ги ослободиме заложниците и да ги вратиме во нивните семејства“, рече Галант. .
Тој го означи убиството на Синвар како порака до жителите на Газа, бидејќи му дојде крајот на човекот кој донесе катастрофа и смрт на палестинската територија и ги натера да страдаат поради неговите убиствени дејствија.
Шефот на израелската армија, генерал-полковник Херзи Халеви, во меѓувреме вчера го посети местото каде што беше убиен Синвар и потврди дека нема информации дека лидерот на Хамас е таму.
