Министерот за здравство д-р Фатмир Меџити денеска беше во посета на Општата болница во Гостивар по повод набавка на нов лапароскоп на одделот за урологија.
Во продолжение, Ви го пренесуваме неговото обраќање во целост:
„Денес сме во посета на Општа болница Гостивар по повод набавка на нов лапароскоп на одделот за урологија. Со ова, првпат во областа на урологија ќе се извршуваат лапароскопски интервенции во болницата и ќе нема потреба пациентите да се упатуваат во Скопје за овој тип интервенции.
Лапароскопската и ендоскопската опрема е набавена од Министерството за здравство во вредност од 10.5 милиони денари.
Со оваа инвестиција значително се унапредува специјалноста урологија во оваа болница, а воедно се проширува опсегот на здравствени услуги кои се обезбедуваат во установата.
Сакам да истакнам дека изминатиот период за установата набавивме и подвижен рентген апарат со C-рака со дигитален детектор во вкупна вредност од 7.7 милиони денари.
Овие инвестиции се показател за континуираното унапредување на условите за третман на пациентите во установата, и со оваа динамика продолжуваме да реализираме нови инвестиции и во следниот период“, изјави Меџити.
