Од „Анима мунди“ велат дека итно треба да се истражи од што починала последната жирафа Флопи во скопската Зоолошка градина.
„Што се случува со ЗОО Скопје, кој ја мониторира здравствената состојба и ја гарантира безбедноста на животните, се откри ли кој ги отру и уби ретките коњи пред неколку месеци; која е причината што вчера почина и жирафата Флопи?! Кога, конечно, ќе разбереме дека животот зад решетки не е живот, туку казна, кога ќе биде веќе еднаш доволно од нивното страдање во доживотно заробеништво и генерирање профит врз грбот на нивните несреќни судбини“, велат од „Анима мунди“.
Тие бараат итно запирање прием на нови единки и промена на концептот на зоолошките во Македонија во центри за рехабилитација на животните, престојот да биде ставен во функција на оние животни што се веќе затекнати и живи, со забрана за набавка на нови.
„Бараме да се искористи секоја можност за нивно подарување во центри во Европа, кои се поадекватни за нивната благосостојба, а за што се ставаме на располагање.
Потсетуваме, животните се држат на тесен простор, на доживотна робија, немаат приватност и има многу малку можност за нивна ментална стимулација, социјализација со сопствениот вид или телесна активност. Тоа резултира во абнормално и самодеструктивно однесување, кое се нарекува зоохоза (од зоопсихоза). Величествените животни во зоолошките стануваат само свои бледи сенки. Одземено им е сè што животот го прави вреден за живеење: семејството, заедницата, слободата и можноста да изберат како ќе го минат својот живот – дури и кога тие животи не се нималку лесни. Бараме да се овозможи комплетен видеомониторинг на сите животни 24/7 и увид во видеонадзорот на сите живеалишта, итно да се открие која е причината што вчера почина и младата жирафа Флопи. Каде е раководството на ЗОО Скопје да се произнесе или поднесе оставка? Бараме итна стручна анализа што се случува и казни за сите што се одговорни“, велат од „Анима мунди“.
