Евакуиран е брачниот пар македонски државјани, кои беа заглавени во завојуваната Газа. Министерот за надворешни работи, Бујар Османи, на „Фејсбук“ објави дека тие утринава го поминале египетскиот премин Рафа и се на безбедно во Каиро.
„Одлична вест тукушто пристигна од Каиро и Тел Авив. Брачниот пар, последните двајца наши државјани што се наоѓаа во ризичните зони, е евакуиран од Газа. Во моментот тие се на безбедно, привремено удомени во Каиро и набргу ќе бидат упатени дома. Сакам да оддадам особено признание за посветеноста и професионалноста до вршителите на работи во амбасадите во Тел Авив и Каиро, Мачеј Качоровски и Елма Алторок, кои вложија извонредни напори во постојана комуникација со надлежните институции на Египет и Израел, како и со нашите државјани“, напиша Османи во објава на „Фејсбук“.
