Клиничката болница Тетово денеска доби нов директор, кој е познат по својата успешна и посветена работа за време на Ковид пандемијата.
Имено, Министерството за здравство информираше дека министерот за здравство д-р Фатмир Меџити денеска за нов директор на ЈЗУ Клиничка Болница Тетово го именуваше д-р Илир Демири.
Тој на оваа функција доаѓа од Клиниката за инфективни болести и фебрилни состојби, каде работеше како координатор за Ковид-19 центарот.
Доктор Демири кој е специјалист инфектолог поседува богато работно искуство, и на Клиниката за инфективни болести и фебрилни состојби работи од 2004 година. Тој од 2007 година е асистент по предметот инфективни болести на Медицинскиот факултет во Скопје, а во 2020 година се стекнува со титулата примариус доктор.
Новиот директор на Клиничката болница Тетово е истакнат професионалец и еден од најпосветените здравствени работници кој се бореше против Ковид 19 од самиот почеток на пандемијата.
Доктор Демири исто така е добитник на титулата „Европска личност за 2020 година“. Оваа титула се доделува на лица кои имаат посебен придонес во афирмацијата на хумани вредности, а ја доделува Европското движење, и е признание кое доаѓа од страна на граѓаните.
Тој важи за професионалец чиј интерес за пациентите не завршува со работното време, и за човек кој се грижи за нивната состојба постојано.
Доктор Демири исто така е член на Македонското здружение за инфективни болести, како и на Комисијата за заразни болести.
