Министерката за одбрана Славјанка Петровска утрово во гостувањето во емисијата „Утрински печат“ се осврна на неколку важни развојни процеси во Министерството и во Армијата, особено во делот на модернизацијата на армиските капацитети и континуираниот раст на одбранбениот буџет кој ги овозможува овие инвестиции кои значат посилна Армија и побезбедна држава која е кредибилен сојузник во НАТО – Алијансата.
„Политички го постигнавме она за што долги години велевме дека е стратешка цел на нашата држава – членството во НАТО, а нашето место таму го оправдавме и со нивото на подготвеност на нашата Армија. Во тој процес има два сегменти – првиот е модернизацијата што е долгорочен процес, зашто не можете во текот на неколку месеци или една година да обновите цело оружје, а вториот се луѓето кои работат, припадниците на Армијата кои треба да се задоволни. Овие два процеси мора да се паралелни, да се надополнуваат зашто тоа е клучот за да имаме опремена и силна Армија“, рече министерката Петровска.
Министерката информираше дека испораката на новите и софистицирани JLTV оклопни возила започна минатата година и дека неодамна на пристаниште во Грција пристигна и втората пратка на 26 вакви возила за потребите на Армијата на Република Северна Македонија.
„Испораката на JLTV започна минатата година и тоа е врз основа на повеќегодишен договор со САД кој е склучен пред неколку години, со оној многу добро познат инструмент на јавноста, а тоа е склучување на договорот Влада-со-Влада. Минатата година стигнаа 6, а сега веќе дополнителни 26 возила, а тие се дел од вкупната бројка 88 вакви возила кои во наредниот период треба да пристигнат и тие ќе бидат сместени во касарната во Штип, односно ќе бидат дел од вооружувањето и опремата на Лесната пешадиска бригада“, подвлече министерката.
Процесот на модернизација е директно поврзан и со буџетирањето на одбраната, кое е во стабилен раст и ќе достигне 2 проценти од БДП до 2024 година.
„Оваа година буџетот на одбраната е 1,85 проценти од БДП, а треба да биде 2% до 2024 година. Тоа се заложбите кои се прифатени на Самитот на Алијансата во Велс и кои што всушност покажуваат дека за да може да ја развивате одбраната онака како што треба, потребно е да имате буџет. Одлуката континуирано да се зголемува буџетот за одбраната е резултат и на тоа дека сме искрени во намерата континуирано да инвестираме во одбраната. Оваа година над 33 проценти од одбранбениот буџет се наменети за овие процеси кои ги почнавме за модернизација и остатокот рамномерно се распределува за она што значи потреби на министерството и на Армијата“, појасни министерката.
Во контекст на развојот на интероперабилноста со сојузниците и заедничкото зголемување на способностите и капацитетите, министерката Петровска ја спомена вежбата „Брз одговор 23“ која започна денеска на „Криволак“. Вежбата е организирана од Командата на Армијата на САД за Европа и Африка, а во нашата земја, освен припадниците на Армијата на Република Северна Македонија, учествуваат и војници од САД, Албанија, Црна Гора и Косово како партнерска земја.
„Оваа вежба е дел од редовните активности кои се планирани однапред во Армијата и во Министерството. Учеството на Северна Македонија во овие вежби исто како минатата година има задача да ја подобри интероперабилноста на припадниците на Армијата и да покаже дека можеме заеднички со увежбување на нашата подготвеност да одговориме на секое сценарио“, заклучи министерката.
Можеби ќе ве интересира…
Претседателот на Владата на Република Северна Македонија, Димитар Ковачевски во интервју за Канал 5 говореше за важноста на реформскиот процес во земјата, за членство во ЕУ. Ковачевски посочи дека меѓународната… Прочитај повеќе
Од Братислава каде учествуваше на Глобсек 2023, министерот за надворешни работи, Бујар Османи, патува за Осло каде ќе учествува на неформалниот состанок на министрите за надворешни работи на земјите-членки на… Прочитај повеќе
По одлуката на Управниот одбор на Стопанската комора на Северна Македонија за основање, се одржа конститутивна седница на која се формираше Националната асоцијација на туроператори и туристички агенции на Република… Повеќе
Две третини од испитаниците или 65,3 отсто изјавиле дека државата треба дополнително да ги регулира условите и начините за земање на брзи кеш кредити, додека 16,7 проценти сметаат дека за… Повеќе