Претседателот Стево Пендаровски денеска се обрати на онлајн самитот на лидери и шефови на влади на земјите-членки на Основачката група за формирање Специјален трибунал за казнивост на кривичното дело агресија против Украина.
Во продолжение го проследуваме интегралниот текст од обраќањето на претседателот Пендаровски.
Почитуван претседател на Украина,
Почитувани шефови на држави и премиери на земјите-членки на групата,
Ваши екселенции,
Дами и господа,
Дозволете ми, на почетокот, да изразам благодарност до мојот колега, претседателот на Украина, г. Зеленски, за упатената покана да учествувам на овој Самит.
Денеска се одбележува 78-мата годишнина од крајот на катастрофалната Втора светска војна. Повоениот период создаде услови за длабока трансформација на светот во меѓународен правен поредок со либерални вредности и ефективни меѓународни институции. Сите генерации на повоени европски политичари беа уверени дека нашиот континент никогаш повеќе не треба да биде сведок на ваква страшна трагедија.
За жал, овој Самит се одржува во време на невидени предизвици за безбедносната архитектура на Европа, поттикнати од нелегалната инвазија на Русија врз Украина.
Светот е исправен пред нова историска пресвртница од крајот на Студената војна. Употребата на сила од страна на Русија против суверенитетот и територијалниот интегритет на Украина е акт на агресија со јасно кршење на член 2 став 4 од Повелбата на ОН и бесрамен предизвик за меѓународниот правен поредок.
Уште од самиот почеток, најостро ја осудивме нелегалната инвазија од Русија. Можам да ве уверам дека поддршката на Северна Македонија за независноста и територијалниот интегритет на Украина е непоколеблива.
Мораме да бидеме обединети и солидарни со Украина бидејќи Украинците не само што ја бранат својата земја, туку ги бранат и основните начела на Повелбата на ОН.
Ваши екселенции,
Северна Македонија постојано ја истакнува важноста за постоење на независен и ефективен Меѓународен кривичен суд. Очигледно е дека мора да се обезбеди целосна одговорност за воените злосторства и сите други злосторства поврзани со војната на Русија, вклучително и одговорност за злосторствата на агресија.
Целосно ја поддржуваме Заедничката изјава за формирање на Специјалниот трибунал како меѓународен механизам кој има за цел да ги гони злосторствата на агресија извршени од страна на Руската Федерација против Украина. Нашата земја се приклучи кон групата и го поддржува формирањето на Специјален трибунал кој ќе ги истражува и гони сите злосторства на агресија и да ги изведе сторителите пред лицето на правдата согласно меѓународното право.
На крај, изразувам уверување кон нашите украински пријатели дека, заедно со нашите меѓународни партнери, ќе направиме се за Украина да успее, меѓународното право да се почитува и мирот и територијалниот интегритет на Украина да бидат целосно вратени во рамките на нејзините меѓународно признаени граници.
