Слободните медиуми се предуслов за отворено и демократско општество, каде што слободата на изразување е право и одговорност, која може да ја практикува секој од нас, порача претседателот Стево Пендаровски по повод 3 Мај – Меѓународниот ден на слободата на медиумите.
Претседателот во пораката вели дека Меѓународниот ден на слободата на медиумите, кој годинава е посветен на слободата на изразување како двигател на сите други човекови права, го одбележуваме во услови на повеќекратните кризи, кои ја окупираат нашата сегашност.
„Политичарите, власта, опозицијата, граѓанскиот сектор – сите мора да бидеме единствени и гласни во обезбедувањето поголеми права, безбедност и услови за работа на новинарите и медиумските работници за тие да може професионално да ја извршуваат својата одговорна задача. Да информираат навремено, точно и без цензура, ослободени од политички или бизнис-притисоци“, вели Пендаровски.
Заедно со новинарите, додава тој, да се бориме и против лажните вести бидејќи граѓаните имаат право на точни, навремени и проверени информации.
