Нема да се преиспитува пресудата за „Јавна соба“ од Врховен суд, барањето е одбиено

Советот за казниви дела при Врховниот суд одлучуваше по поднесените барања за вонредно преиспитување на правосилна пресуда по предметот познат во јавноста како „Јавна соба“.

„Советот за казниви дела при Врховниот суд на Република Северна Македонија донесе пресуда Квп 2. бр. 23/2023, со која барањата за вонредно преиспитување на правосилната пресуда на Основниот кривичен суд Скопје К. бр. 1851/21 од 11.3.2022 година и пресудата на Апелациониот суд Скопје КЖ. бр. 588/22 од 24.11.2022 година ги одби како неосновани“, велат од Врховниот суд.

Во овој случај жртви на „Јавна соба“ на „Телеграм“ во 2020 година беа девојки, каде што со прикриен идентитет членовите разменуваа телефонски броеви и експлицитни фотографии. По згаснувањето на оваа група, други лица основаа друга група со истото име, кое функционира долго време. И во неа се споделуваа броеви од жени и девојки, но и нивни разголени фотографии.