“Дали и кога ќе ги отвориме поглавјата од преговорите со ЕУ и колку тие ќе траат сега комплитно зависат од нас како држава и институции. Ако пред години зависеше од Грција, од Франција или од Бугарија, сега зависи од нас. Колку побрзо ние ќе си ја завршиме домашната задача, пред се да се изгласаат уставните измени, да ги отвориме поглавјата и потоа колку брзо ќе ги спроведуваме реформите зависи само од нас“ рече потпретседателот на СДСМ, Стефан Богоев во „Утрински печат“.
Тој додаде дека очекува Шведска професионално да претседава со Унијата, но кажа дека повеќе не е тема дали земјата претседавач е блиска со нас или со некоја друга земја, бидејќи го надминавме тој процес.
„Ова е најсериозната предност што сите овие години ја имаме. Работата зависи само од нас и тоа мора да го искористиме, без разлика кој претседателствува со ЕУ“ рече Богоев.
Потпретседателот на СДСМ истакна дека е поголема веројатноста 80 пратеници да гласаат за уставните измени, отколку 61 пратеник да поддржат распуштање на Собранието и предвремени избори.
„Пологично е пратеници да се одважат и да гласаат за да го забрзаат евроинтегративниот пат, да останат запишани како луѓе кои направиле добро и суштинско за државата, отколку пратеници од владејачкото мнозинство да гласаат за распуштање на Собранието“ рече Богоев.
