„Авио сообраќајот има можност за развивање и од двата аеродрома во државата и токму поради тоа обојавивме јавен повик, кој ќе трае три години и на кој ќе може меѓународни авиокомпании да аплицираат и да добијат помош од државата за отворање на нова линија од нашите аеродроми“ рече министерот за транспорт и врски, Благој Бочварски во „Топ тема“ на Телма.
Тој објаси дека договорот со Виз ер беше суспендиран во 2020 година и дека сите 13 компании кои оперираат од нашите аеродроми во моментов работат без субвенции.
„Ние не ги делиме компаниите на нискобуџетни или поинаку, нашата субвенција е седум евра од Скопје и четири и пол евра од аеродромот во Охрид. Сметам дека сите големи авиокомпании може да аплицираат и да понудат дестинација, која во моментов не е воспоставена“ рече Бочварски.
Министерот кажа дека во 2019 година беше достигнат, досегашниот, максимум за превезени патници од двата аеродрома – 2,7 милиони патници по што поради ковид-кризата бројката се намали.
„Оваа година стигнавме до 2,3 милиони патници, со што се покажува дека авио сообраќајот се враќа по ударот од ковид-пандемијата“ рече Бочварски кој кажа дека во моментов од Скопскиот аеродром се лета до 38 дестинации, а од Охридскиот до 7.
