Centar.mk – Вести, бизнис, забава, спорт…
Македонија

Стојаноска: Покачување плата во услови кога инфлацијата кај храната е 30 отсто е неопходност, а не расипништво

„Продолжува расправата по амандманите на Комисијата за финансирање и буџет, а СДСМ и понатаму ги одбива предлозите на ВМРО-ДПМНЕ и коалицијата кои се на барање на граѓаните“ изјави Дафина Стојаноска, пратеничка на ВМРО-ДПМНЕ.

Таа посочи дека „во текот на изминатите денови се закануваат дека ќе го поништат изгласаниот амандман со кој на вработените во јавната администрација е предвидено да им се зголемат платите за 15%. Амандманот поднесен на барање на Сојузот на синдикатите на Македонија треба да се потврди и од Законодавно-правната комисија. Се надеваме дека ќе преовлада разумот кај колегите и ќе сфатат дека покачувањето на плата во услови кога инфлацијата кај храната е 30% е неопходност, а не расипништво“.

„Денес пратениците ќе го разгледуваат амандманот што се однесува на викенди без ДДВ. Ова е еден од 10-те предлози кои ги усвои Централниот комитет на ВМРО-ДПМНЕ и кои е неопходно да бидат вклучени во буџетот за 2023 година. Со предлогот на ВМРО-ДПМНЕ и коалицијата се предвидува секој викенд додека во Македонија има прогласено кризна состојба во енергетскиот сектор, а тоа е до 30 април 2023-та година, да има викенд без ДДВ за прехранбени производи. На овој начин граѓаните ќе можат да купуваат основни прехранбени производи, а потоа парите за платениот ДДВ да ги добијат назад на своите трансакциски сметки“, рече Стојаноска.

Од пратеничката група на ВМРО-ДПМНЕ апелираат „колегите од мнозинството сериозно да размислат за предложениот амандман за којшто ќе расправаме денес. За државниот буџет овие средства се незначителни, а за граѓаните и тоа како битни“.