Секоја сериозна политичка партија којашто и мисли добро на државата, треба да биде дел од лидерската средба која што ја свика премиерот Димитар Ковачевски и која во овој политички момент е важна, рече заменик претседателката на СДСМ, Сања Лукаревска во дневникот на Сител телевизија.
-На лидерската средба нема за друго да се разговара освен она што е важно за европската перспектива на земјава. Да дојдеме до еден политички, општествен консензус за европската иднина, за европскиот пат. На граѓаните им треба ЕУ перспектива, тоа е за она што треба да се разговара. Секако дека може да се отворат и други теми, рече Лукаревска.
Заменик претседателката Лукаревска додаде дека секој сериозен лидер, секоја сериозна политичка партија треба да даде придонес во интерес на граѓаните и државата.
-Очекувам дека ќе надвладее разумот и секој сериозен лидер и сериозна партија којашто и мисли добро на државата треба да биде дел од дебатата во понеделник на лидерската средба, рече Лукаревска.
Лукаревска потенцираше дека изборите ќе бидат во редовен термин до 2024 година.
