„Опасен е ставот дека Договорот од Преспа не даде резултати, тоа едноставно не одговара на вистината. По Преспанскиот договор ни се отворија многу врати, станавме членка на НАТО и имаме многубројни придобивки“ рече вицепремиерот Бојан Маричиќ во „Клик плус“ на ТВ21.
Тој додаде дека треба да бидеме горди на Договорот од Преспа, кој ја отклучи вратата и за добивањето на автоќефалност на нашата црква.
„Сметам дека тој договор треба да го чуваме, да го браниме и спроведуваме доследно. Преспанскиот договор не штити од самоволија и нови проблеми“ рече Маричиќ.
Вицепремиерот додаде дека на патот кон ЕУ земјите од Западниот Балкан треба да се борат и да го оправдаат даденото ветување за станување земји-членки. Како што кажа Маричиќ, Северна Македонија треба да се бори за нашата позиција и да докаже дека сака и може да биде членка на ЕУ.
