Вицепремиерката задолжена за политики за добро владеење, Славица Грковска денеска имаше средба со Русос Кундурос, амбасадор на Република Грција во земјава.
Амбасадорот Кундурос ја пренесе пораката на официјална Атина дека грчката Влада ја поддржува Република Северна Македонија за почеток на преговорите со Европската Унија и добивање датум за одржување на првата меѓувладина конференција и тоа, како што кажа Кундурос, недвосмислено е укажано на земјите членки на Европската Унија.
Грковска се заблагодари на поддршката што Грција ѝ ја дава на нашата држава на европскиот пат и укажа дека во заеднички интерес, но и во интерес на Европската Унија е да имаме стабилен Балкан кој ќе промовира пријателство.
На состанокот се разговараше и за интензивирање и продлабочување на меѓусебната соработка, но и размена на искуства особено во делот на дигиталната трансформација на општеството и креирањето на антикорупциските политики.
Грковска информираше дека искуството на Грција во процесот на дигитализацијата за нас ќе биде од големо значење. Таа додаде дека за нашата држава е важно да креираме политики кои ќе бидат применливи, одржливи и долгорочни.
