По најавата за штрајк на наставниците во понеделник, се огласи и Министерот за образование Јетон Шаќири на социјалните мрежи:
По надминувањето на предизвиците со пандемијата, сега кога конечно се воспостави континуитет на настава во училиштата, учениците мора да останат таму каде што им е местото – во училниците. Повторно прекинување на воспитно – образовниот процес и нивно затворање во домовите не е добра опција. Затоа, апелирам до сите кои се засегнати од предизвикот за кој Владата и СОНК ќе продолжат да дебатираат во рамки на социјалниот дијалог, да продолжиме да делуваме водејќи се според најдобрите интереси на младите и постапувајќи согласно законските прописи, кои всушност и го гарантираат правото на образование.
Секако дека нашата намера е да излеземе во пресрет на барањата на наставниците за повисоки плати и тоа со методолошки пристап, како во изминатите три години, кога во три наврати ги зголемивме личните приходи на наставниците за над 21%.
Иако работиме во вонредни околности и услови на актуелна здравствена, но и економска криза, решение бараме и ќе најдеме, а од истото ќе нема незадоволни страни.
