Владата денеска го овласти министерот за транспорт и врски, Благој Бочварски, да ја потпише декларацијата со назив „Самит на министри посветен на железниците – Пругите се иднината“.
Претстојниот самит ќе се одржи во организација на Постојниот секретаријат на транспортната заедница, во соработка со Европската инвестициска банка и Европската банка за обнова и развој, информираат од владината прес-служба.
Декларација што ќе ја потпише Бочварски, меѓу другото, предвидува повторно воспоставување директни меѓуградски експресни возни врски помеѓу главните градови на Западен Балкан и ЕУ за да се воспостави подобра поврзаност за деловните субјекти и луѓето, дигитализација на железничките системи за меѓусебно поврзување и овозможување размена на податоци за прекуграничен превоз на патници и товарен транспорт до крајот на 2025 година.
Исто така, се предивидува и склучување договори One Stop Go меѓу сите регионални партнери и соседните земји на ЕУ за сите железнички гранични премини до четвртиот квартал на 2023 година со цел да се олеснат процедурите за граничен премин за патници и товар.
