Премиерот Зоран Заев испрати писмо со честитки по повод празникот Велигден до д-р Киро Стојанов, бискуп скопски и апостолски егзарх во Северна Македонија, во кое во негово и во име на Владата на Република Северна Македонија, на сите верници на Католичката црква во нашата земја, како и на сите верници од протестантските деноминации во земјата коишто денеска го празнуваат, им го честита големиот христијански празник – Велигден.
Претседателот на Владата Заев во писмото пишува дека и годинава еден од најсветлите празници се празнува со ограничувањата кои ги донесе пандемијата на коронавирусот КОВИД-19 и во период кога целиот свет се соочува со тешки искушенија.
„Саможртвата на Христос е подвиг од љубов посветен на нас луѓето, со кој Бог ни се даде како пример токму кога за момент сè изгледаше како пораз. И кога темнината и тишината настапија на земјата, Он воскресна и со смрт смртта ја победи за да ни ја врати со целата полнота надежта“, истакнува премиерот Заев во честитката до верниците од католичката и протестантските заедници во земјата по повод Велигден.
Премиерот Заев порачува дека на празникот посветен на спасението и на новиот живот, да се потсетиме на потребата да бидеме достојни верници и чесни луѓе, и низ нашата скромност да понесеме саможртва за доброто на сите, заштитувајќи се себеси и здравјето на ближните.
„Токму светлината на овој празник во овие драматични мигови за човештвото, не поттикнува да се преиспитаме, да создаваме добри дела и да покажеме разбирање еден со друг, да бидеме љубезни во кругот на нашите семејства, помеѓу соседите и пријателите и севкупно во нашата држава. Христос со воскреснувањето ни покажа нешто навистина ново, нешто што ја промени состојбата на човештвото и светот и ни дава надеж и сила за победа над сите човечки ситуации на страдање и неправда“, пишува премиерот Заев во честитката до верниците од католичката и протестантските заедници во земјата по повод Велигден со желби празничните денови поминат во добро здравје и духовна сила со пораката „Христос воскресна!“.
