Претседателот на ВМРО-ДПМНЕ, Христијан Мицкоски, оствари средба со новонименуваниот француски амбасадор Силир Бомгартнер, на која Мицкоски му посака добредојде и му посака плодотворна работа во земјата.
На средбата, на која учествувале и партискиот потпретседател Александар Николски и Игор Николов, се разговарало за актуелната политичка, економска, како и здравствена состојба предизвикана од пандемијата на Ковид-19.
Новиот француски амбасадор Бомгартнер бил запознаен со последиците од корона-кризата со кои се соочува земјата на здравствен и економски план, а станало збор и за бугарското вето на патот на Македонија кон ЕУ.
Мицкоски упатил благодарност за континуираната поддршка што Франција ѝ ја дава на Македонија во процесот на интеграција во ЕУ.
Тој го информирал новиот француски амбасадор дека ВМРО-ДПМНЕ како политичка партија има јасни и конкретни политики кои ќе ја изнесат Република Македонија на прав пат, како и тоа дека ќе имаат позитивно влијание на членството во Европската Унија.
