На денешната седница на собраниската комисија, на која се дискутираат измените на Законот за заштита на населението од заразни болести, пратеничката од ВМРО-ДПМНЕ, Дафина Стојаноска, истакна дека иако состојбата е алармантна, на старо-новата Влада ѝ требале повеќе од 40 дена за да донесе некомплетно предлог-законско решение, во кој период имало илајдници заразени и стотици починати граѓани.
„Состојбата е алармантна, ќе одам хронолошки, па ќе потсетам дека старо-новата Влада се избра на 30 август оваа година, што значи дека се поминати 40 дена откако профункционира и 40 дена ѝ требаа за да поднесе ваков предлог-закон за состојба за која вие велите дека ВМРО-ДПМНЕ го кочи, а ние ве чекаме да донесете едно некомплетно предлог-законско решение“, истакна пратеничката Стојаноска.
Таа вели дека конкретните амандмани се нецелосни, погрешни и небулозни.
„Бројките на 30 август во однос на новозаразени – чудно, тој ден беа паднати од претходниот од 131 новозаразен на 39 новозаразени и 4 починати, а вчера имавме 628 новозаразени и 15 починати лица, 40 дена ѝ требаа на власта, во кој период имавме илјадници новозаразени и неколку стотици починати, за тоа опозицијата во парламентот не сноси вина, затоа што 40 дена го чекавме ова законско решение, кое дојде на 8 октомври, а денеска сме 28 октомври за кое ви текна по 20 дена да поднесете амандмани на ова законско решение, кое е итно“, рече Стојаноска.
