Основното јавно обвинителство Охрид поднесе обвинителен предлог против охридскиот советник Нефи Усеини и брат му поради насилство.
„Основното јавно обвинителство Охрид денеска до Основниот суд Охрид поднесе обвинителен предлог против две лица, браќа на возраст од 45 и 48 години, за кои постои основано сомнение дека како соизвршители го сториле кривичното дело насилство од член 386 став 3 во врска со став 1 од Кривичниот законик.
Обвинетите на 18 август 2020 година, околу 11:30 часот, по претходен договор извршиле грубо насилство врз едно лице при што во јавноста, кај присутни гости и вработени во хотелот ‘Јуник’ во Охрид, предизвикале чувство на несигурност, загрозување и страв. Обвинетите го повикале оштетениот на средба во хотелот, па откако тој пристигнал со возило, на совозачкото седиште седнал еден од обвинетите. Веднаш започнале расправија, излегле од возилото кај паркингот пред хотелот, каде во меѓувреме пристигнал и вториот обвинет.Во тој момент, двајцата обвинети физички го нападнале оштетениот“, соопшти Обвинителството.
При тоа, на еден од обвинетите од пантолоните му испаднал тврд предмет во облик на пиштол, кој потоа го зел брат му. Оштетениот со тупаници бил удиран во пределот на главата и телото пред влезот на хотелот и внатре, каде обвинетите во пределот на главата го удирале и со тврдиот предмет во облик на пиштол. По извршеното насилство со кое на оштетениот му биле нанесени телесни повреди, двацата браќа го напуштиле местото на настанот.
Јавниот обвинител кој постапува во предметот до надлежниот суд достави и посебен предлог за продолжување на определената мерка притвор за двајцата обвинети, поради постоење опасност од нивно бегство, се вели во соопштението.
Апелациониот суд во Битола претходно го поништи решението на охридскиот суд за прифаќање на гаранцијата од 30.000 евра за да се бранат од слобода.
