Францускиот претседател Емануел Макрон претстави историски план за помош од осум милијарди евра за произведувачите на автомобили, загрозени од последиците на пандемијата на коронавирус.
Парите би требало да послужат и за модернизација на секторот во Франција, за да земјата стане предводник во производството на електрични автомобили.
„Државата ќе даде нешто повеќе од 8 милијарди евра за тој сектор“ рекол Макрон за време на посетата на фабрика за автоделови.
Тој додал дека целта на помошта е Франција да стане прва економска земја во производството на „чисти автомобили“ во наредните пет години, со повеќе од еден милион електрични и хибридни автомобили годишно.
Макрон најавил зголемување на „еколошките субвенции“ за купување електрични возила на 7.000 евра за граѓаните и на 5.000 евра за фабрики, како и субвенции од 2.000 евра за возила на хибриден погон.
Од компанијата „Рено“ Макрон побара гаранции за иднината на вработените во двете фабрики, чија судбина е неизвесна.
