Претседателот на државата, Стево Пендаровски, преку својот фејссбук-профил изрази сочувство за Италија и сите нејзини жители, за големиот број на жртви од коронавирусот.
„Тажни вести слушаме од Италија секој ден. Бројот на жртви од Ковид-19 во едно деноноќие се брои во неколку стотици. Сликите од болниците се страшни, а трендовите се неповолни. Загрижувачки вести слушаме секојдневно и од многу други земји, во нашиот регион и подалеку“, истакнува претседателот.
Тој смета дека иако кај нас бројките се само во благ пораст, мораме да бидеме претпазливи.
„Да ги почитуваме препораките, да бидеме одговорни кон јавното здравје и да бидеме солидарни, колку можеме да си помагаме. Ограничете го своето движење и излегувајте од дома само за значајни потреби“, вели претседателот додавајќи дека ова е заедничка битка, за заштита на сите околу вас.
