Министерот за здравство, Венко Филипче, на прес конференција извести за новите два случаи на коронавирус.
Се работи за двајца сопружници на 62-годишна и 68-годишна возраст во Дебар. Дијагнозата е поставена дури денеска, иако тие стигнале во Македонија на 27-ми февруари од Италија со автобус. Како што кажа тој, автобусот застанувал и во Куманово и во Скопје пред да стигне до Дебар. Сопружниците претходно биле кај матичен лекар, но тој не се посомневал на коронавирусот.
Двајцата сопружници во текот на овие денови имале контакт само со братот на жената, со него се прави интервју за да се види дали во изолација треба да се стави само тој или и членовите на неговото семејство.
Рече дека сите лица кои патувале со нив (околу 40-тина), се веќе идентификувани и ќе се прават разговори со нив и дали ќе се стават во изолација.
Двајцата сопружници вечерва со специјално возило ќе бидат пренесени на Инфективната клиника во Скопје.
