Над 450 деца Роми, чии семејства се во социјален ризик, се ослободени од плаќање партиципација за посетување градинка во рамките на блок-дотациите што локалните самоуправи ги добиваат од Министерството за труд и социјална политика.
Почнувајќи од декември 2018, Министерството за труд и социјална политика системски ја решава инклузијата на деца Роми со вклучување на единиците на локалната самоуправа како дел од зацртаните цели од Националната стратегија за Ромите 2014-2020.
Раниот детски развој е основата за понатамошниот развој и едукација на секој поединец и токму затоа МТСП изминатите две и пол години посветено и силно работи на вложување во раниот детски развој. Инвестирано е во 43 градинки, а истовремено се јакнат и професионалните компетенции на воспитувачите преку разни програми, но и со зголемување на платите. Само во текот на минатата година платите на вработените во градинките се зголемени 26 отсто, соопшти Министерство за труд и социјална политика.
