Во Штип почна со работа нов дневен центар за лица со интелектуална попреченост постари од 18 години.
На отворањето присуствуваше министерската за труд и социјална политика, Мила Царовска, која истакна дека центарот има капацитет од 20 лица, а во моментот го посетуваат 15 корисници, кои добиваат дневно згрижување, стручна работа и рехабилитација.
„Развојот на ваквиот вид услуги на локално ниво ги следи индивидуалните потреби на секое дете и лице со попреченост и на нивните семејства. Овие сервиси се мост до другите системи на поддршка. Само така можеме да обезбедиме целосно вклучување на лицата со попреченост во општеството“, порача министерската.
Просторот на центарот е обезбеден од Општината, а набавката на опремата со дополнителна опрема и дидактички средства се планирани од МТСП за 2020 година.
Министерството за труд и социјална политика ја поддржува работата на 32 дневни центра, кои ги посетуваат околу 450 деца и лица со попреченост./Makfax
