За неколку дена во Лондон, нашата држава седнува на масата на лидерскиот самит на алијансата, рамноправно со најмоќните земји на светот. Министрите за одбрана и за надворешни работи, Радмила Шекеринска и Никола Димитров, на денешната средба со шефот на канцеларијата на НАТО во Скопје, полковникот Зоран Јанковиќ, се заблагодарија за целата досегашна поддршка од НАТО-канцеларијата, особено поддршката во последните две години и истрајноста во достигнувањето на оваа, за граѓаните и државата, децениска стратешка цел.
Средбата се реализира во пресрет на самитот на алијансата во Лондон на 3 и 4 декември, на кој ќе учествува висока владина делегацијата, предводена од претседателот на Владата, Зоран Заев.
Министерката Шекеринска посочи дека нашето учество на лидерскиот состанок на НАТО, како рамноправни со другите 29 сојузници, е историски ден за државата.
„Првпат не дозволуваме некој друг за нас да дискутира, туку седиме на масата на која се носат одлуки што влијаат на целиот свет. На состанокот на НАТО-лидерите ќе бидеме не само присутни туку и ќе учествуваме и за разлика од ситуацијата пред една и пол година во Брисел, кога за нас се дискутира без да бидеме внатре, сега ќе имаме можност да кажеме – да, ние нашата историска улога ја исполнивме. Тоа немаше да се случи да не беше стратешката поддршка на сите граѓани на оваа држава, тоа немаше да се случи без навистина стратешкиот поглед на Владата, но тоа немаше да се случи и без големата поддршка од страна на алијансата“, рече министерката Шекеринска по средбата.
Министерот Димитров ги истакна посветеноста и важноста што нашата земја му го придава на членството во НАТО претставувајќи ги нашите позиции во однос на актуелни значајни прашања за алијансата.
„Денес, со колешката Шекеринска имавме убава можност да му се заблагодариме на полковникот Јанковиќ, кој заедно со сите свои претходници има голем удел во претстојниот голем успех – исполнување на една од двете најголеми стратешки цели, практично од нашата независност. Нè дели само една ратификација од полноправното членство. Во Министерството за надворешни работи веќе подготвивме нацрт-закон за ратификација на северноатлантскиот договор. Како што рече генералниот секретар Столтенберг – убаво е да се има пријатели, убаво е да се има моќни пријатели и првпат на лидерската маса ќе бидеме застапени, предводени од премиерот Заев, на 3 и 4 декември во Лондон. Тоа што за 10 месеци имаме 28 ратификации, говори дека сме добредојдени во алијансата и се надеваме дека тоа ќе биде одбележано и во еден параграф од завршната декларација на состанокот на лидерите во Лондон“, рече тој.
Шефот на канцеларијата на НАТО во државата, полковникот Јанковиќ, изрази задоволство од средбата со министрите Шекеринска и Димитров непосредно пред историскиот самит, каде што ќе се разговара за многу важни теми за алијансата.
„Досега имавте можност да земете директно учество во состаноците на ниво на началници на генералштабови, на ниво на министри, но следната недела ќе имате можност да седите на маса на лидерскиот состанок. Ова е всушност многу важен показател на посветеноста и напорот што го вложивте во последниве две години, што, секако, е резултат на работата на оваа Влада, а особено би рекол на Министерството за одбрана и Министерството за надворешни работи, и од мое лично име би сакал да ви се заблагодарам за овие напори“, рече полковникот Јанковиќ.
