Вицепремиерот задолжен за европски прашања, Бујар Османи, го отвори Секторскиот мониторинг комитет за Помош при транзиција и градење на институциите (ТАИБ), кој се одржа во Клубот на пратеници.
Како што информираат од владината прес-служба, паралелно со ова се одржале и трет состанок на Секторскиот мониторинг комитет за владеење на право и фундаментални права, прв основачки состанок за демократија и владеење, трет состанок за конкурентност, иновации, земјоделие и рурален развој, како и прв основачки состанок за образование, вработување и социјална политика.
„Успешното спроведување на проектите финансирано преку ИПА продолжува, и тоа претставува најдобар промотор на европските перспективи на земјава“, истакна Османи, потенцирајќи дека, независно од политичката состојба во која се наоѓаат европските интеграции по октомврискиот самит, продолжуваат и реформите и хармонизацијата на нашето законодавство со европското, со цел приближување до европските правила, стандарди и вредности.
„Европските перспективи остануваат водечка улога во создавањето на нашата политика, при, што, унапредувањето на апсорпцијата на ИПА средствата има клучна улога“, потенцираше вицепремиерот.
