-Оваа влада предводена од СДСМ и Зоран Заев направи се во однос на интегративниот процес на државата. Подготвени сме кога ЕУ ќе одлучи да ги отпочнеме преговорите, до тогаш јасно е дефинирано на лидерската средба, побаравме брзи предвремени избори, на 22 декември, но ВМРО-ДПМНЕ побегна од избори. Ние сме спремни и за почеток на преговорите со ЕУ, секако и за брзи избори кога и да се одржат. Единствени кои што бегаат од брзи предвремени избори се ВМРО-ДПМНЕ и Христијан Мицкоски, изјави денеска Костадин Костадинов, портпарол на СДСМ и пратеник, одговарајќи на новинарско прашање дали постои некоj договор помеѓу партиите за одложување на изборите за 12 април, во случај да не завршат ратификациите на договорите за влез во НАТО и дали СДСМ има став во однос на едно вакво сценарио.
Костадинов: СДСМ е за интеграција во НАТО и ЕУ, понудата на Мицкоски е поделби и квази сојузи со други држави, затоа ќе ги загубат изборите
– Во ВМРО-ДПМНЕ не знаат кај тераат, нивната понуда за обнова на режимот доведува до секојдневни скандалозни изјави од високи функционери на опозициската партија. Еден од членовите на Извршниот комитет на ВМРО-ДПМНЕ порача да не се покачуваат платите, друг член пак повика на припојување со други држави. Освен противење на покачувањето на минималната плата и платите во приватниот сектор, можевме да чуеме и антидржавни, антимакедонски ставови. Христијан Мицкоски наместо да се оградува од политиките на Никола Груевски жестоко ги брани. Неодговорните изјави на високите партиски функционери на ВМРО-ДПМНЕ го покажуваат вистинско режимско лице на оваа партија на штета на државата, изјави на денешната прес конференција, Костадин Костадинов, портпарол на СДСМ и пратеник.
-Обнова на режимот, одбрана на криминалот и обнова на поделбите и изолацијата се единствената понуда на Мицкоски и ВМРО-ДПМНЕ, а со таква понуда можат да се надеваат само на пораз на предвремнените избори на 12 април. Додека понудата на Мицкоски е поделби и квази сојузи со други држави, СДСМ е за интеграција во НАТО и ЕУ. Додека понудата на Мицкоски е да не расте минималната плата, СДСМ ја покачува на историски највисоки 14,500 денари и работи на ново зголемивање. Тоа граѓаните ќе го ценат на 12 април, рече Костадинов.
