Кандидатот за претседател Стево Пендаровски попладнево беше во посета на Петровец, Илинден и Зелениково каде со граѓаните од овие општини разговараше за повеќе актуелни теми, претседателските избори и напредокот во евроинтегративниот процес.
Пред жителите на општина Петровец, Пендаровски им порача дека по подолг период, државата се приклучи кон развиениот свет и сега треба да се продолжи уште попосветено напред.
,,НАТО ни даде покана за членство, со ова е обезбедена нашата сегашност и иднина. Дваесет и девет најмоќни земји сега се со нас, не сме сами. Не се поставува прашањето дали ќе не биде. Република Северна Македонија сега е своја на своето. Затоа, да ја искористиме шансата и да продолжиме напред”, истакна Пендаровски.
На средбите со граѓаните од општина Илинден и Зелениково, Пендаровски потенцираше дека ова е избор помеѓу два концепти, едниот, кој води напред во подобра иднина и вториот, предводен од Сиљановска кој ја враќа државата назад во минатото.
,,На другата опција која нема план и визија, да им кажеме дека не сакаме повторно враќање во темното минато. Тоа што го постигнавме како Влада и ги отворивме вратите кон ЕУ и НАТО има историски огромна важност, бидејќи само по тој пат можеме да ја зајакнеме економијата, да продолжиме да ги покачуваме платите, да бидеме стимул младите да останат дома и тука да градат иднина”, порача заедничкиот кандидат Стево Пендаровски. ,,Убеден сум дека ќе ги потврдиме и продолжиме прогресивните политики и ќе победиме и на 21 април и на 5 мај, бидејќи носиме подобар живот и европска иднина за сите. Затоа, заокружете број 3, за да продолжиме заедно напред”, повика Пендаровски.
