Министерот за земјоделство, шумарство и водостопанство, Љупчо Николовски, денеска, во Пробиштип, заедно со градоначалникот на Пробиштип, Драган Анастасов, одржа работен состанок со менаџментот на хидросистемот „Злетовица“. На состанокот се разговараше за идните активности за заокружување на реализацијата на првата фаза од проектот за водоснабдување ХС „Злетовица“, која се однесува на водоснабдување со квалитетна вода за пиење и поврзување на општините Карбинци, Лозово и Штип со овој систем.
Министерот Николовски посочи дека досега овој систем не беше целосно ставен во функција и со вода за пиење се снабдуваа само Пробиштип и Свети Николе, а со парите што за годинава ги обезбеди Владата во буџетот на МЗШВ во износ од 3,5 милиони евра ќе се заокружи целиот процес и општините Карбинци, Лозово и Штип ќе се приклучат на системот.
„Хидросистемот ‘Злетовица’ е важен за овој регион. Како Влада и како ресорно Министерство, во 2018 година бевме целосно посветени, ја скениравме целата состојба на терен со цел да креираме соодветни политики преку кои државата ќе даде поддршка за заокружување на фазата еден од овој систем. Овој систем не е во целосна фукнција и со вода за пиење се снабдуваат само Пробиштип и Свети Николе. Затоа, Владата со поддршка од заменик-претседателот на Владата задолжен за економски прашања, Кочо Анѓушев, направи целосно согледување на општините за да ги види нивните потреби, сè со цел реализација на сите потребни инвестиции, за да се стави целосно овој систем во функција и регионот да се снабдува со квалитетна вода за пиење. Поради тоа, во буџетот за 2019 година се одвоија средства, и од МЗШВ и од буџетот на ЗПВРМ, и со нови 3,5 милиони евра, кои се веќе испланирани во развојниот дел на буџетот на МЗШВ, ќе почнеме со поврзување на општините со овој хидросистем“, изјави министерот Николовски.
Притоа посочи дека веќе е распишана тендерската постапка за јавна набавка за избор на консултантска куќа која ќе изработи техничка документација за финализирање на првата фаза, односно водоснабдување преку проектот ХС „Злетовица“ и општините да се поврзат со системот. Отворањето на понудите е закажано за 16 следниот месец.
Министерот Николовски појасни дека со заокружувањето на првата фаза од ХС „Злетовица“ во следниот период активностите на МЗШВ ќе бидат во насока на реализација на втората и трета фаза од ХС „Злетовица“, со што ќе се обезбеди систем за наводнување на 4.100 хектари земјоделско земјиште и изградба на шест мини хидороцентрали.
