-Како што ветивме пред граѓаните минималната плата повторно, согласно нашата промена се зголемува, овојпат на историски највисоки 14.500 денари. Тоа е зголемување за нови 2.000 денари, значително повеќе од досегашните 12.500 денари. Ние враќаме пари кај граѓаните, кај работниците, наместо за споменици и жални врби како што тоа се правеше повеќе од 10 години, изјави на денешната прес конференција, Љупчо Николовски, генерален секретар на СДСМ.
Кога во 2017 ја добивме одговорноста да управуваме со државата и со процесите, рече Николовски, иако минималната плата изнесуваше 10.800 денари, во текстилната и кожарската индустрија, каде што работат голем број работници, платата беше едвај 9.000 денари.
Таа социјална, работничка неправда започнавме да ја исправиме, ја зголемивме минималната плата на 12.000 денари и таа важеше за сите работници, во сите сектори, во сите индустрии, без исклучок, додаде Николовски.
-Со законското усогласување годинава таа порасна на 12.507 денари. А, со последната одлука минималната плата ќе изнесува 14.500 денари. Тоа се 2.000 илјади денари повеќе за работниците секој месец, односно 24.000 денари повеќе годишно. Се грижиме за работниците, го цениме и го вреднуваме нивниот труд. Тоа е прав пат! – изјави генералниот секретар на СДСМ.
-Споредбено со претходниот минимум во индустриите за кожа, текстил и чевли кој изнесуваше 9.000 денари, со новото покачување минималната плата во овие индустрии се зголемува за 5.500 денари, односно над 60 отсто. Дополнително, би истакнал дека со ова новото покачување, Република Северна Македонија има највисока минимална плата во регионот на Западен Балкан, односно имаме поголема минимална плата споредено со Србија, Босна и Херцеговина, Албанија и Црна Гора. Растот на минималната плата се темели на реални економски параметри со што обезбедуваме повеќе пари во семејствата, но и поттикнуваме дополнителен раст на останатите плати и спирала на континуирано зголемување на просечната плата во државата, што и се случува, рече Николовски.
