Од утре Фитосанитарната инспекција на терминалот во Кавадарци ќе почне со работа во две смени. Државниот инспекторат за земјоделство, кој е орган во состав на Министерството за земјоделство, шумарство и водостопанство, ја донесе оваа одлука како одговор на барањата на бизнис-заедницата за овозможување брз и непречен извоз на земјоделски производи, што во овој период е особено важна за извозот на грозјето.
Во согласност со одлуката, првата смена на инспекцијата ќе биде од 8 до 16 часот, од 18 до 24 часот втора смена, а во сабота и во недела фитосанитарната инспекција ќе работи од 19 до 24 часот.
Воведувањето на сменското работење на терминалот во Кавадарци е уште еден показател за политиките на МЗШВ во делот на создавање поволни услови за бизнис-заедницата. Со воведувањето на втората смена се очекува надминување на административните бариери со кои се соочуваат правните субјекти што извезуваат грозје. Конкретно, ќе се овозможи брз, ефикасен и непречен извоз на горзје, што значи и заштеда во време и пари како бенефит за правните субјекти.
