ВМРО-ДПМНЕ, освен што шири невистини, нема ама баш никаков кредибилитет да зборува за попис бидејќи цели 11 години на власт партијата не успеа да организира попис на населението, стои во реакцијата на СДСМ по повод обвинувањата од Наум Стоилковски дека власта сака набрзина да го протурка законот за попис со цел да избегне дебата.
Од владејачката партија истакнуваат дека целокупната подготовка за организирање на пописот е професионална и транспарента, по сите меѓународни стандарди и во неа цело време е вклучен „Евростат“.
„Колку ВМРО-ДПМНЕ не се грижи за законите и колку е лицемерно нивното однесување покажува само еден факт: од декември минатата година до ВМРО-ДПМНЕ е доставен на разгледување Изборниот законик и после 6 месеци партијата нема кажано ништо“, стои во партиската реакција.
Од СДСМ изразуваат надеж дека ВМРО-ДПМНЕ ќе се организира и ќе најде потенцијал да го разгледа Изборниот законик и да соопшти став во однос на истиот.
Додаваат и дека очајните закани на ВМРО-ДПМНЕ се показател дека во опозициската партија ништо не се променило, туку дека таму се уште главен збор има Никола Груевски.
