Американскиот претседател Трамп вчера изјави дека цената на најпродаваниот лек за слабеење на компанијата „Ново нордиск“ ќе биде намалена, а се очекува преговорите да бидат брзи, како и за лековите за плодност.
Трамп го објави ова во Белата куќа за време на настан за третмани за плодност и цени на лекови. Новинарите го прашаа да го именува лекот за кој рече дека ќе биде поевтин.
„Мислев на ‘оземпик’, или – мислев – на лекот за слабеење?… Ќе биде многу поевтин“, рече Трамп.
Трамп рече дека планот на неговата администрација ќе ја намали цената на лекот од 1.300 долари на 150 долари. „Оземпик“ има каталошка цена од приближно 1.000 долари за месечна резерва, но „Ново нордиск“ им го продава директно на клиенти што плаќаат во готово за 499 долари за месечна резерва.
Трамп исто така рече дека цената на лековите за ин витро оплодување исто така ќе биде намалена. „Со задоволство објавувам дека компанијата ‘Емд Сероно’ се согласи на значително намалување на цените на лековите за плодност, што се продаваат во Соединетите Американски Држави“, рече тој./Извор:Makfax
