Демократските сили на Ромите (ДСР) вчеравечер ја одбележаа 23-годишнината од основањето со свечен настан на кој присуствуваа членови, симпатизери и пријатели на партијата. Во обраќањето, претседателот на ДСР и актуелен министер без ресор задолжен за интеграција и имплементација на Стратегијата за инклузија на Ромите 2022–2030, д-р Шабан Салиу, се наврати на почетоците, говореше за сегашните институционални обврски и ја претстави визијата по локалните избори на 19 октомври, на кои е кандидат на ДСР за градоначалник на Општина Шуто Оризари.
„Кога ја основавме ДСР, влогот беше едноставен и огромен, да ја претвориме болката од дискриминацијата во политичка сила и еднакво граѓанство. Не баравме милостина, баравме правила што важат за сите и институции што служат и на Ромите“, рече Салиу, потсетувајќи дека ДСР е создадена како политички одговор на системските неправди кон ромската заедница.
Осврнувајќи се на сегашноста, Салиу нагласи дека учеството во Владата носи јасна институционална одговорност.
„Како министер, мојата обврска е да ја претворам политичката порака во мерлива институционална работа, од координација на националните политики за инклузија до отворени врати за граѓаните. Државата мора да биде предвидлива, отчетна и фер. Тоа е единствениот начин да градиме доверба кај Ромите,“ истакна на прославата претседателот на ДСР, д-р Шабан Салиу.
Зборувајќи за претстојните локални избори, Салиу порача дека Шуто Оризари има сила за промена.
„Влегуваме со победничка енергија и јасен системски план за функционална инфраструктура, силно образование и култура, фер здравствена и социјална грижа, локална економија што отвора работни места и зелена, транспарентна општина со јавно управување и отчет. Не ветуваме, остваруваме“, порача во својот говор првиот човек на ДСР и кандидат за градоначалник на Шуто Оризари, Салиу.
Тој додаде дека кампањата на ДСР се темели на политичка зрелост и граѓанска одговорност.
„Нашата борба е мирна и уставна. Ќе продолжиме да бидеме штит и глас на Ромите, со јасен став и резултати што се гледаат на секоја улица и во секој дом во Шуто Оризари“, рече Салиу.
фото Демократските сили на Ромите (ДСР)
