Ако се стремите кон природно и еколошко одгледување, содата бикарбона може да ви стане еден од најкорисните помошници. Ова соединение, познато и како натриум бикарбонат, е природно присутно во изворска и геотермална вода, а во градинарството се користи за намалување на киселоста на листовите и спречување на развој на габични инфекции.
Како делува содата бикарбона?
Со зголемување на pH вредноста на површината на листовите, содата го оневозможува ртењето на спорите на габите. Таа може да помогне при заштита од различни штетници и болести, како лисни вошки, пајаци, полжави, прашкаста мувла, пламеница, црни дамки и антракноза.
Рецепти и начини на употреба
1. Основен раствор за прскање
Растворете 50 грама сода бикарбона во 10 литри вода. Прскајте еднаш неделно, а особено по дождливи денови, бидејќи влагата ја поттикнува појавата на габични заболувања.
2. Подобрена формула со масло и детергент
Во 2 литри вода додајте 2 лажички сода бикарбона, капка растително масло (на пр. маслиново) и капка благ детергент за садови без белило. Маслото помага растворот да се задржи на листовите, а детергентот овозможува подобро растворање на содата.
3. Мешавина со млеко
Измешајте 1 лажица сода бикарбона со 1 литар млеко, потоа разредете во 10 литри вода. Внимавајте на дозирањето – премногу концентриран раствор може да ги оштети листовите. Оваа комбинација е ефикасна и против компировата бубачка, бидејќи млекото не е сварливо за неа и нејзините ларви.
Дополнителни примени
Отстранување пестициди од овошје и зеленчук.
Чистење градинарски алат.
Важни препораки
Пред првата употреба, тествајте го растворот на мал дел од растението.
Никогаш не прскајте при силно сонце или високи температури – тоа може да предизвика оштетување и појава на „плускавци“ на листовите.
Избегнувајте високи концентрации – премногу натриум може да се наталожи во почвата, да врзе елементи како железо и калциум и да доведе до пожолтување и слаб раст.
Прво испрскајте со чиста вода, па потоа нанесете го растворот, особено на долната страна на листовите каде што често се кријат штетници.
Содата бикарбона е едноставна, евтина и ефикасна алтернатива за одржување на здрави растенија, но како и со секое средство – правилната употреба е клучна за добри резултати.
НАЈЧИТАНО НА ИНТЕРНЕТ...
