Нема да дозволиме Собранието да стане арена на манипулации и поделби. Законите што имаат цел да го поделат албанскиот народ и да го одржуваат во живот корумпираниот систем немаат место во нашата агенда, велат од „Влен“ за законот за бранителите, кој е во собраниска процедура.
Пратениците од „Влен“ ја напуштија седницата, соопшти коалицијата, коментирајќи дека тука се за да го бранат правото на албанскиот народ и да бараат сеопфатно решение за сите рани од минатото, вклучително и статусот на поранешните борци на УЧК.
„Законот влезе во процедура затоа што според новиот Деловник нема можност да не се стави на дневен ред закон предложен од пратеник, Влада или кој било што има право да предложи закон. Опозицискиот СДСМ уште еднаш покажа дека нема намера да гради заедничка иднина за граѓаните, туку да ги отвора раните од минатото за ниски политички придобивки. А ДУИ продолжува да ја игра својата старо-нова игра, насочена кон одвлекување на вниманието од своите криминали“, велат од „Влен“.
Oд коалицијата претходно порачаа дека нема да дозволат усвојување на овој закон доколку тој не биде во пакет со законот за решавање на статусот на војниците од поранешната УЧК./Извор:Makfax
