Направивме многу во изминатите години, ги покачивме платите и пензиите, ја преполовивме невработеноста, обезбедивме рекордни инвестиции, вративме 2,6 милијарди евра назад кај граѓаните, станавме членка на НАТО, започнавме преговори со ЕУ, навистина многу, но имаме и грешки, рече претседателот на СДСМ, Димитар Ковачевски во обраќањето на 28 Конгрес на СДСМ.
-Јас сум искрен човек, а СДСМ е партија која секогаш е отворена пред граѓаните. Ние во изминатите седум години правевме и грешки. Некои беа кадровски, некои беа политички. Јас не се срамам да го признаам тоа. Знам дека во нашата држава сè уште има граѓани чие секојдневие е тешко, кои живеат во сиромаштија. Знам дека има граѓани кои се заглавени во лавиринтите на правниот систем. Знам дека има многу простор за подобрување на состојбите во здравството и во образованието. Сето тоа го знам, рече Ковачевски.
Но, знам и нешто друго. Во изминатите седум години донесовме и многу храбри и државнички одлуки, додаде Ковачевски.
-Ја ослободивме заробената држава која беше на 138 место по слободата на медиумите. Станавме рамноправна членка на најмоќната НАТО Алијанса. По 17 години чекање, конечно ги откочивме преговорите за членство во Европската Унија. Ова се резултатите кога вистински се сака татковината.
Ковачевски додаде дека СДСМ е подготвен да се менува и заедно со граѓаните да го обезбеди промените за подобра иднина.
-Заедно со вас мои драги сопартијци, ја делам и одлучноста, копнежот за подобро утре и решителноста да направиме повеќе за граѓаните, за нашите деца, за државата. Горд сум и среќен и сето ова ми дава надеж дека сме на вистинскиот пат, додаде Ковачевски.
