Неизвесноста и стравот од можни рестрикции на струја поради енергетската криза ги натера граѓаните спас да бараат во огревното дрво. Но, поради лошото менаџирање и неспособноста на Владата на СДС, огревно дрво нема ни за лек, истакна на денешната прес-конференција Цветан Трипуновски, претседател на Комисија за земјоделство.
„ЈП ‘Македонски шуми’ оваа година немаат ниту 20 проценти реализација на исечено огревно дрво потребно за задоволување на домашната потрошувачка. Во услови на енергетската криза кога сè повеќе домаќинства што се грееле на струја, се ориентираат кон греење на дрва, ‘Македонски шуми’ немаат доволни количини со овој енергент. Граѓаните, наместо да бидат услужени во подружниците на ЈП ‘Македонски шуми’, се препраќаат кај приватните стоваришта. Дека станува збор за смислено сценарио, односно за префрлање големи профити кај приватни лица наместо во ЈП ‘Македонски шуми’, говори фактот што во време на ВМРО-ДПМНЕ реализацијата на годишната сеча се движела до 90 проценти, а само околу 10 проценти од потребите биле задоволувани од страна на приватните стоваришта. За разлика од сега, кога реализацијата е само над 20-ина проценти“, вели Трипуновски.
Додава дека ЈП „Македонски шуми“ оваа година на пазарот на огревно дрво практично понуди 4 пати помалку дрво за греење во однос на минатите години.
Намалената понуда, според него, влијае и на зголемување на цените на огревното дрво во приватните стоваришта, која се движи над 5.000 денари за кубен метар.
„Но, проблем нема само со дрвата. Голем дел од граѓаните се греат и на печки за пелети, а недостиг има и таму. Истиот тренд на зголемување го имаме и кај цените на пелетите, чија цена во однос на лани е зголемена тројно. Ако лани цената беше 12.000 денари за тон, денес еден тон пелети чини над 35.000 денари. Сето ова е предизвикано од недостигот на дрвна маса, огревно дрво и дрво за преработка, причинети од недоволното производство на ЈП ‘Македонски шуми’“, истакнува Трипуновски.
Тој жповика, Љупчо Николовски како ресорен министер, но и целата Влада, да одговори пред граѓаните зошто дозволија да има недостиг на огревно дрво, а со тоа и негово поскапување, кога знаеме дека навремената сеча можела да го реши овој проблем.
„Дали народот плаќа скапо огревно дрво и скапи пелети за поединци од власта да се богатат? Одговорност за лошото менаџирање со институциите, неспособноста и негрижата на власта, не смеат да ја плаќаат граѓаните“, потенцира тој.
