Претседателката на Европската комисија, Урсула фон дер Лајен, истакна денеска, во пресрет на Самитот ЕУ-Западен Балкан на Брдо кај Крањ, дека со овој собир Унијата испраќа многу важна порака до регионот, а тоа е дека Западен Балкан припаѓа на ЕУ.
Сакаме да испратиме многу јасна порака, а тоа е дека Западен Балкан припаѓа на ЕУ. Ние ги сакаме во ЕУ. Ние сме едно европско семејство. Делиме иста историја, вредности и убедена сум во истата судбина – рече таа.
Фон дер Лајен нагласи дека членките на ЕУ сакаат интеграција на Западен Балкан бидејќи знаат дека тоа е добро и за Западен Балкан и за ЕУ.
– Имаме заеднички интереси и можеме да се развиваме подобро заедно. Интеграцијата на Западен Балкан на заедничкиот пазар мора да напредува. Мојата порака до Западен Балкан е – ве сакаме во ЕУ, продолжете со реформите, целта е пред нашите очи – рече претседателот на Европската комисија.
Таа оцени дека земјите од Западен Балкан постигнаа значителен напредок во реформите, но и дека треба да се работи повеќе во областа на владеењето на правото, правдата и слободата на медиумите.
– Но, ние мора да го признаеме напредокот што е постигнат – нагласува фон дер Лајен.
Таа додаде дека Економскиот и инвестицискиот план за Западен Балкан ќе биде една од важните теми за време на Самитот, нагласувајќи ја важноста на регионалната пазарна интеграција.
– Со Економскиот и инвестицискиот план од речиси 30 милијарди евра, ќе можеме да направиме вистинска разлика и да инвестираме во проекти за Зелена агенда, дигитализација и оние што се корисни за регионот – вели Фон дер Лајен.
Пред Самитот, претседателот на ЕК потсети дека ЕУ е најголемиот партнер во регионот и оцени дека граѓаните од Западен Балкан можат да имаат најмногу придобивки од ЕУ.
– Висок квалитет, сигурност, транспарентност и јасна идеја за цената, без услови – вели Лајен.
Таа го истакна огромниот позитивен ефект што интеграцијата во ЕУ го имаше врз земјите -членки, почнувајќи од подемот на стандардите, растот на економијата, до зајакнувањето на демократијата.
НАЈЧИТАНО НА ИНТЕРНЕТ...
